-
ผญาอีสานบ้านเฮา
หล่านางเอย...
ซื่อว่าคนฮักแท้ เห็นแต่แม่กับเจ้า ท้อนี้แล้ว
เพียงแรกเจอกะเผลอฮัก นอนบอหลับอยากเห็นเจ้า
บ่ได้ตี๊แถลงเว้า บ่สนเคาคือควายดอนดอกนางเอ้ย
เห็นแต่คอ ส่องเห็นแต่หน้า กะปานได้นั่งนำ พู้นแหล่วนางเอย
-
หล่านางเอย...
บ่าวแก่นทองคนผมดก
ลูกชายกกพ่อใหญ่สี...
ซื่อว่าคนฮักแท้มีแต่แม่กับพ่อ ท่อนั้นแล้ว
ลืมตาตื่นขึ้นมาพ้อ เห็นแต่แม่ยัดนมเข้าปากป้อน
เห็นแต่พ่อเฮ็ดอู่ไกวต้อน นอนดีสบายอยู่
แม่ผู้หย่ำข้าวน้ำ หมกใส่กล้วยกะแซบอยู่เด๊...นางเอย
-
หล่านางเอย...
อ้ายมักน้อง มาตั้งแต่โดนๆ
มักตั้งแต่เมืองสกล ยังบ่ทันได้ตั้ง
ขอนแก่นยังเป็นบ้าน ทางรถไฟบอทันแลน
มักตั้งแต่พู้น ปานนี้ยังคือเก่า...นางเอย
-
หล่านางเอย..
คันแม่นน้องฮักอ้าย ให้แนมเบิ่งดวงอีเกิ้ง
ยามเห็นกบกินเดือนให้เคาะเสาเฮือนไว้
คันพ่อเจ้าหลับแล้วให้ถอนกลอนหน้าต่าง
อ้ายสิปีนข้ามฮั้วหานิทานก้อมเว้าสู่ฟัง...นางเอย
-
หล่านางเอย....
คันน้องมักไผแท้ ให้น้องเอามือซี้ ตามใจน้องสิเลือก
มักอ้ายทิดผู้นั่งเอียง มักอ้ายเซียงผู้นั่งใกล้ หรือมักอ้ายผู้บ้านไกล
บ่าวแก่นทองคนผมดก ลูกชายกกพ่อใหญ่สีผู้นี่ น้องบอชี้กะตามซาง
วาสนาคืออึ่งยางโดดบ่ไกลคือกบ บอสมเจ้าดอก...นางเอย
-
“คันเจ้าได้ขี่ซ้างกั้งฮ่มเป็นพระยา
อย่าได้ลืมคนทุกข์ผู้ขี่ควายคอนกล้า”
“คันเจ้าได้ขี่ซ้างกั้งฮ่มสัปทน
อย่าได้ลืมคนจนผู้แห่นำตีนซ้าง”
-
ชมรมฯแก่นทองเพิ่นเอ็ดไว้ เว็บไซต์คนอีสาน
เป็นการโฮมความฮัก รักษ์ษาภาษาเค้า
คนอยู่ไกลกะได้ซ้น คนหลายคนกะได้เบิ่ง
เปิดเบิ่งแนเด้อเว็บไซต์ เผื่อได้เห็นเจ้าของ
-
หล่างนางเอย..ฉายาอ้าย
" บ่าวแก่นทองคนผมดก ลูกชายกกพ่อใหญ่สี "
ยังบ่อมีคู่ช้อน กอดแต่หมอนนุ่นฮ้าง คางพาดแต่สะหนา
วาสนาคืออึ่งเพ้า โดดบอไกลคือจังกบ สาวใด๋น๊อสิเหลียวเบิ่ง
มาหลูโตนแมนบักอ้าย อาสานอนสะหนาน้อย พอได้กายแขนนางเอย
-
คันได้กินลาบซิ้นอย่าลืมแจ่วแพวผัก
ได้กินพาเงินพาคำอย่าลืมกระเบียนฮ้าง
-
คันเจ้าได้อยู่ยอดฟ้าผาสาทประดับมุข
อย่าได้ลืมเฮียมทุกข์ผู้ขี่ควายคอนกล้า
-
คันเจ้าได้ขี่ซ้างกั้งฮ่มเป็นพระยา
อย่าได้ลืมคนทุกข์ผู้ขี่ควายคอนกล้า
-
คันเจ้าได้ขี่ซ้างกั้งฮ่มสัปทน
อย่าได้ลืมคนจนผู้แห่นำตีนซ้าง
-
นกเขาตู้พรากคู่กะยังขัน
กาเวาวอนพรากฮังกะยังฮ้อง
น้องพรากอ้ายคำเดียวบ่เอิ้นสั่ง
คันบ่เอิ้นสั่งใกล้ขอให้เอิ้นสั่งไกล
-
หล่านางเอย..
คันแม่นน้องฮักอ้าย ให้แนมเบิ่งดวงอีเกิ้ง
ยามเห็นกบกินเดือนให้เคาะเสาเฮือนไว้
คันพ่อเจ้าหลับแล้วให้ถอนกลอนหน้าต่าง
อ้ายสิปีนข้ามฮั้วหานิทานก้อมเว้าสู่ฟัง...นางเอย
มีคนมาวอนเว้า คำผญามันกะหม่วน
ชวนกันมาพี่น้อง อย่าลืมถิ่มปล่อยปะ
ข่อยกะเขียนเจ้ากะแต้ม แนมอ่านกะนวลหู
ดูยังมีมนต์ขลัง อีสานยังบ่ทันล้า
ผญายังมีไว้ ให้คนหลังยังได้อ่าน
มูลกะยังคู่บ้าน อีสานก้ำบ่เสื่อมสูญ
-
ขอบคุณครับที่มาเสริม
-
กวีศิลป์แต่งแต้ม
เสนาะโสต สนานเสียง
เว้าสำเนียงชาวอีสาน
ให้ม่วนยิน บ่วายเว้น
แม่นเข็ญจน ยังทนสู้
ผญาคู่อีสาน ให้ยืนยิ่ง
สิ่งควรค่าเลิศล้ำ ให้คงมั่น
คู่อีสาน อ้ายเอ้ย
-
พี่น้องเอ้ย เพิ่นว่าชมรม"แก่นทอง"เฮานี่ มีดีอยู่หลายอย่าง
อยากให้ซ่อยฮักษาไว้ อย่าไลถิ่มเปล่าดาย
คั่นสิพากันสร้าง แปงทางให้มันเกี้ยง
อันว่าเรื่องปากเสียง ให้อดสาเก็บไว้
ไม้ลำเดียวอ้อมฮั่วบ่อยู่ ไหมหลายไจดึงซ้างจังสิคือ แท้นอ
ขอให้ฮักกันไว้ คือข้าวเหนียวนึ่งใหม่
อย่าสิไรซังกัน คือเข้าเหนียวถูกน้ำ
ไผว่าชมรม"แก่นทอง"สิฮ้าง ให้จูงแขนพามาเบิ่ง
คนยังแตกจ้นจ้น มันสิฮ้างแมนบ่อนได๋ นั่นแหลว
เซื้อซาติแฮ้งอย่าเหม็นสาบกุยกัน
เกิดเป็นคนอีสานให้ฮักแพงกันไว้
ไผเฮ็ดดีให้ซอยยู้ ซอยซูอย่าหย่านลืน
ไผเฮ็ดผิดให้ซอยเว้า ไขแก้ดอกซอยกัน อิอิ yoyox32
-
งึดหลาย
-
ให้ HS4VQN น้องหล่าอยูนำจักคนแน
ใจน้องฮักคักแท้ ผญาเค้าถิ่นอิสาน
อย่าเพิ่งคิดรำคาญ น้องซายหล่าเด้ออ้ายพี่
อันแนวใดว่ามันดี ซอยกันสอนซอยกันเว่า
สิฮับเอาดอกพี่เอ้ย..ฝากโตกับหัวใจแนเด้อคับ
-
คนคือบอทันเฒ่า..คือสิเว้าผญาเป็น
-
หล่านางเอย...
บ่าวแก่นทองคนผมดก
ลูกชายกกพ่อใหญ่สี...
ซื่อว่าคนฮักแท้มีแต่แม่กับพ่อ ท่อนั้นแล้ว
ลืมตาตื่นขึ้นมาพ้อ เห็นแต่แม่ยัดนมเข้าปากป้อน
เห็นแต่พ่อเฮ็ดอู่ไกวต้อน นอนดีสบายอยู่
แม่ผู้หย่ำข้าวน้ำ หมกใส่กล้วยกะแซบอยู่เด๊...นางเอย
ป้าดทีโท้คารมอยูบ่อหยอกตั้วนี่